Әсә бәхете

Бөгөн иртән эшкә килеп ултырыу менән, телефондан бәхетле әсә тауышы яңғыраны. Һәйбәт хәбәргә зар-интизар сағыбыҙ, күңел күтәрелде лә китте, әйтерһең, илгә тыныслыҡ килде тигән яңылыҡты ишеттек. 

- Ике малайым да офицер, Алыҫ Көнсығышта хеҙмәт итәләр, икеһе ла Украинала, бына инде 8 ай йөрөйҙәр, береһе Рифат, икенсеһе - Рәфис. 

Яҡупова Рәйфә апай шатлығын кемгә әйтергә белмәйҙер (хатта уның йылмайыуҙан туҡтамаған йөҙө күҙ алдына килде), беҙҙең менән дә һөйөнөсөн бүлешергә булған. Рәхмәт. Яҡшы хәбәр - йән аҙығы.

- Рәфисем ҡайтып килә, отпускыға. Әле Ырымбурҙа инде, Абдулда, йүгеренеп, уны ҡаршыларға әҙерләнеп йөрөйбөҙ. 

Йә, Хоҙай, барлыҡ әсәләргә лә улдарын көтөп алырға яҙһын, - ошолай тип теләк теләнек (әлеге мәлдә иң күп тапҡырҙар әйтелгән теләк). Рәфис ҡайтһын, Рифат ҡайтһын, бөтәһе лә имен-аман ҡайтһын. Барлыҡ әсәләр, шатлыҡтарынан нимә эшләргә белмәй, улдарын ҡаршы алып йөрөһөн. Ҡатындарыбыҙҙың береһен дә Әсә бәхете урап үтмәһен - әллә нисәмә һүҙ теҙҙек тә ҡуйҙыҡ. 

Бөгөн бер Абдул ауылы ғына түгел, бар донъя ҡыуана кеүек.