Беренсе һәм аҙаҡҡы булһын ине

Матәмде оҙаҡҡа һуҙманылар, мәрхүм һалдаттың ғүмере кеүек, тиҙ тамамланды.

Парфенов Андрей 1975 йылғы, Маяҡ ауылында тыуған, ошондағы 8-се мәктәпте тамамлаған, аҙаҡ ошо ауылдағы уҡ СПТУла тракторсы-машинист һөнәренә уҡыған. Өфөлә йәшәгән. Шунан яуға киткән, 2 ғинуарҙа һәләк булған. Ике һөйләмгә һыйырлыҡ биография -бер кеше ғүмере. Һалдат менән хушлашыуға халыҡ йыйылды. ҡала башлығы Олег Астахов, ҡоролтай депутаты Фәнит Моратбаҡыев та бар. Ошо ике вазифалы кеше генә телмәр тотто, башҡалар өндәшмәне. 

- Рәхмәт, лайыҡлы егетте тәрбиәләгәнһегеҙ, еңеүҙең хаҡы буш булмай, бына ошондай егеттәр уны ғүмере менән түләй. 

Йыйылған халыҡты ҡарайбыҙ, күбеһе ҡарт-ҡоро. Йәштәр юҡ, тиерлек. Ауылдарҙағы халыҡ ҡартая, хәйер, ҡалала ла шулай тигән уйҙар үтте баштан һәм бына ошо уй ҙа, ныҡ теләмәһәк тә, мейене сүкене: Андрей быйыл ерләнгән беренсе һалдат.

Беренсе һәм аҙаҡҡы булһын ине ул.