Клубҡа барһаң, зонтик ал

Яманһары мәктәбен ике ҡатлы итеп төҙөгән мәлдә (1986 йыл, буғай) уны планлаштырыусылар алда нимә булырын белмәгәндер. Юҡһа, бәләкәйерәк итеп төҙөрҙәр йәки бөтөнләй был эшкә тотонмаҫтар ине - иҫкеһен әүеш-төүөш итер ҙә, уныһы, ауылда балалар бөткәнсе ярап торор ине. Әммә бына тора ул - мөһабәт бина. Эсендәге ала торғанын алып бөттөләр, янындағы котельныйын да һүттеләр (торбаһы елле ине - үҙе аҡса), ә ҡалған өлөшөн нимә эшләтергә лә белмәнеләр. Бер мөйөшөндә ФАП, икенсеһендә - китапхана, өсөнсөһөндә - клуб.