Абдулда комиссияла иҫәптә торған бер бала ла, ғаилә лә юҡ

Бөгөн Абдул ауылында район имам-хатибтарының "Ғаилә һәм дини нигеҙҙә балалар тәрбиәләү" тип аталған семинар-кәңәшмәһе үтте. Ни өсөн тап Абдулды һайлағандар был семинар өсөн, быныһын район хакимиәте башлығы урынбаҫары Л. Хәмитова аңлатты: сөнки был ауылда комиссияла учетта торған бер бала ла, ғаилә лә юҡ, суицид та юҡ. Сараға имамдарҙан, хакимиәттән тыш, Дини назараты рәйесенең 1-се урынбаҫары Айнур Арыҫланов та килгән. Оҙаҡ ҡына нисек бала тәрбиәләргә тигән темаға телмәр тотолдо (заманаһы заманамы ни - йолаларҙы тотҡан ауылдар бөтә, балалар интернеттан башҡаны белмәй, телевидениела атыш та үлтереш). Ысын сабый урынына ҡурсаҡ һалып, балаға исем ҡушыу йолаһын күрһәтте Абдул имам-хатибы Илдар Усманов. Яҡупта мулла юҡлығына зарланып алдылар. Аҙағыраҡ Кинйәбыҙ музейына сәйәхәт ҡылдылар барыһы ла. Семинарҙың маҡсаты матур, ғаиләләргә уның йоғонтоһо ла булһа ярар ине.