Әйтмәһәгеҙ ҙә беләбеҙ

Ошо шәмбелә үтәсәк бөтөн тантаналар, ҙур дата, оло байрам, ҡунаҡтар ҙа байтаҡ ҡына көтөлә. 

Был мәктәп-интернатты кем генә тамамланы, күптәр һаман булһа, сәстәре салланып, үҙҙәре олатай-өләсәй булып бөтһәләр ҙә, рәхмәт әйтә: әлдә ошо интернат булды, эшкә өйрәтте, яҡшы белем дә бирҙе, тормошҡа ныҡлап әҙерләне. 

БРГИ-ны тамамлаусылар араһында төрлөһө бар, әлбиттә, Аҡ йорттарҙа ултырғандары, ябай тракторисы... Ҡайҙа эшләһә-йөрөһәләр ҙә, береһе лә төшөп ҡалған һаналмай, бында, әлбиттә, ошо уҡыу йортоноң роле ҙур. 

Директоры ғына юҡ бит әле? Уныһы шулай, күптәр, ҡаланың милли тормошона битараф булмағандар, баш вата: кемде ҡуйырҙар? Беҙ Мәғариф министрлығы сайтын арҡыры-буйына ҡарап сыҡтыҡ, был турала (конкурс хаҡында) бер һүҙ юҡ. Йәшертен генә үткәрәләрме икән әллә? Шулай ҙа, теге йырҙа йырланғанса: беләм бит, күрәм бит, һиҙәм бит, тигән шикелле, халыҡтың эске тойомлауы хәтәр - беләбеҙ инде кем булырын тип, алдан уҡ бер кешене тәғәйенләп тә ҡуйғандар. 

Былары хаҡында (кешенең һиҙемләүе хаҡмы-юҡмы) алдараҡ белербеҙ, ә әлегә әҙерләнәбеҙ - Мортаза Рәхимов исемендәге башҡорт республика гимназия-интернаты үҙенең ҙур юбилейын ҡаршылай!