Зерә шәп сыға икән

Гәзитегеҙ зерә шәп сыға икән. Ошоға тиклем “Юшатыр”ҙы гел интернет аша ғына уҡып бара инем. Был төркөмдә бар яңылыҡтар ҙа оператив рәүештә сығып бара.
Әнейем “Юшатыр” гәзитенә яҙылған да, миңә редакциянан барып алырға ҡушты. Барып алдым да, уҡып ҡараным. Гәзиттең эстәлекле, уҡымлы булыуына таң ҡалдым.
Гәзитте тотоп уҡыу, интернет ҡарап ултырыу түгел икән, тип уйлап ҡуйҙым. Гәзиттә ҡыҙыҡ-ҡыҙыҡ мәҡәләләр тулыһынса баҫылып сыға икән, уларҙы бирелеп китеп уҡып сыҡтым. Хәҙер әнейемә алып барырҙан алда гәзитте үҙем ҡыҙыҡһынып уҡып сығам.
Фәнзиә САРБАЕВА
Күмертау ҡалаһы

Афарин, күршеләр!
- "Юшатыр" гәзитен байтаҡтан беләм тип әйтһәм дә була. Интернет селтәрҙәрендәге һәр мәҡәләгеҙҙе уҡып барам. һеҙҙе белгәнгә тиклем үҙебеҙҙең район гәзитен алдыра инем, "Юшатыр"ҙы уҡығандан һуң, Федоровка гәзитенән баш тарттым. Уларға әйттем: ҡасан "Юшатыр" һымаҡ яҙа башлайһығыҙ (тел, стиль, ҡурҡмай яҙған темаларҙы күҙ уңында тотам), шунда ғына һеҙҙе алдыра башлайым, тим. Афарин, күршеләр. Гәзитегеҙ ғүмерле булһын.
Филюз ЮЛДАШБАЕВ,
Федоровка районы, Юлдаш ауылы

Мең рәхмәт
Хөрмәтле редакция! Һеҙҙең гәзиттә шиғырҙарымды уҡып ныҡ ҡыуандым! Беренсе шиғырҙарым менән яҡташтарымды, туғандарымды ҡыуандырған өсөн һеҙгә мең-мең рәхмәт! Эшегеҙҙә, тормошоғоҙҙа ҙур уңыштар, ныҡлы һаулыҡ, халыҡты ҡыуандырып шулай сауап алып йәшәүегеҙҙе теләйем! Шулай кешелекле булып ҡалығыҙ! Һәр бер һорауҙы яуапһыҙ ҡалдырмайһығыҙ.
Хәтимә ИМЕЛБАЕВА
Тимербай ауылы

Райондың көҙгөһө
“Юшатыр”гәзите – райондың көҙгөһө, тип әйтергә кәрәк. Ауыл хужалығы, мәҙәниәт, мәғариф кеүек барлыҡ темаларҙы ла яҡтыртаһығыҙ. Ҡайҙа ниндәй сара үткәнен яҙаһығыҙ, юбилейҙар менән ҡотлауҙарҙы ла ҡыуана-ҡыуана уҡыйым. Күңелде ҡырғаны МХОла үлгән егеттәрҙе уҡыуы. Ныҡ йәлдәр... Гәзит биттәрендә әлбиттә, уларҙың яҡындарының ҡайғыларын уртаҡлашыу кәрәк инде.
Таныш кешеләрҙе күрһәм ҡыуанам, бигерәк тә мәҙәниәт өлкәһе кешеләрен, Венер Хәмитовтарҙы уҡып шатланам.
“Юшатыр”ҙың барлыҡ хеҙмәткәрҙәрен дә хөрмәт итәмен. Айгөл, Гөлнур, Гөлназ ҡайҙан һеҙ шул тиклем матур һүҙҙәр табып бөтәһегеҙ ул?! Ә Малик Малик инде ул, рәхмәт яуғыры. Уның тура һүҙлеге оҡшай, берәүгә лә ярамһаҡланып тормай тураһын сәпәй. Ҡайһы берәүҙәр, улар яҙып нимә үҙгәртәләр инде, тигән булалар. Бөтә кеше лә “Юшатыр”ҙар кеүек уйлаһа, бәлки үҙгәрер ине лә... Гәзитте ҡулға алам да, был юлы кемде сәпәне икән тип ҡарап сығам. Әле лә М.Ильясовтың “Нисек мин башлыҡ булдым” материалын уҡығас ҡулыма ҡәләм алырға булдым. Был мәҡәләлә нисә башлыҡтар һаналып киткән, әммә мин улар араһындағы Әхәт Ҡотлоәхмәтовты хөрмәт иттем, әле лә хөрмәт итәм мин уны. Ул беҙҙең ансамблебеҙгә күлдәктәр тектерҙе, баян алып бирҙе, мәҙәниәт йортобоҙ ҡыйығын да яптырҙы. Былар бит мәҙәниәт аҡсаһына түгел, ә уның аҡсаһына эшләнде. Вәғәҙә бирә икән, шунда уҡ эшләп тә ҡуя торғайны ул. “Юшатыр”ҙар ҙур рәхмәт һеҙгә. Артабан да шулай эшләгеҙ. Гәзитте ҡулыма алғас та тәүҙә тиҙ генә уҡып сығам, аҙаҡ яйлап тағы ла яңынан уҡыйым.
Рәмилә ӘКБӘРОВА
Зәк-Ишмәт ауылы

Редакциянан: әле "Юшатыр"ға яҙылыу бара, беҙҙең менән булғандар артабан да беҙҙең менән ҡалыр тип ышанабыҙ.

Зерә шәп сыға икән

Интернет гәзит түгел