Түҙемһеҙләнеп көтәбеҙ

Хәтерегеҙгә төшөрәбеҙ, 2023 йылда Комсомол урамындағы паркта беренсе сираттағы объекттар төҙөкләндерелде – памп-трек һәм скейт-майҙансыҡ төҙөлдө. Уларҙы самокат һәм велосипедта йөрөүсе әүҙем йәштәр күптән үҙләштереп тә өлгөрҙө.
Быйыл был парктты төҙөкләндереү буйынса эштәр дауам итә – йәйәүлеләр өсөн юлдар, эскәмйәләр һәм ял итеү зонаһы төҙөлә. Спорт менән шөғөлләнеү өсөн төрлө ҡоролмалар ҡуйыласаҡ һәм күркәм ял өсөн башҡа күп төрлө эштәр башҡарыласаҡ.
- Парктың төҙөлөп бөтөүөн түҙемһеҙләнеп көтәбеҙ, был парк беҙҙең ишек алдына яҡын урынлашҡан, балаларыбыҙ рәхәтләнеп шунда ял итер, беҙ инде уларҙы тәҙрәнән ҡарап ҡына күҙәтә алырбыҙ. Республика башлығы балаларыбыҙҙы уйлауы, уларҙың ялы матур уҙһын өсөн, беҙҙең өсөн дә мөһим булған ошондай программалар булдырыуы бик ыңғай күренеш, - ти Комсомол урамында йәшәүсе Хәмит Рахманғолов. Радий Хәбиров муниципалитеттарҙы үҫтереү программаларын тормошҡа ашырғанда уңайлы ҡала мөхитен булдырыу – мөһим бурыстарҙың береһе, сөнки уңайлы йәмәғәт мөхите халыҡтың йәшәү сифатын яҡшыртыуға булышлыҡ итә, тип билдәләне. Был үҙ эсенә төҙөкләндерелгән парктарҙы, скверҙарҙы, ял итеү зоналарын, яҡшы үҫешкән инфраструктураны һәм мәҙәни сараларҙың асыҡлығын ала.