Күккә ашҡан һалдат йәнелер был...

Күккә ҡарап ниҙәр кисерҙегеҙ,
Өҙөлдөмө һеҙҙең дә үҙәк?
Болот булып өҫтөбөҙҙән үтте
Юл тоҡсайы аҫҡан һалдат-һүрәт

Биштәрендә ниҙәр бар, тиһегеҙме?
Барҙыр инде... барҙыр... кәрәге.
Һаҡлап ҡына йотҡан һыуы барҙыр...
Окоп ҡаҙыр өсөн – көрәге...

Күккә ашҡан һалдат йәнелер был -
Болот булып, алға барышы.
Үлһә лә ул, һаҡта тора һаман...
Анттар биреп алған яҙмышы.

ФӘЙРҮЗӘ САЯПОВА