Беренселәр

"Движение первых" тип аталып, яңы ғына төҙөлгән ойошманың еткәселәре, береһе Көйөргәҙе районынан, Дмитрий Глущенко, икенсеһе Күмертауҙан - Ксения Козюкова. 

Сәғәттән ашыу әңгәмәләштек, йәштәрҙең был ойошмаһы, ғөмүмән, нимәгә кәрәк булды әле? 

- Беҙгә кабинет та биреп ҡуйҙылар.

- Һәйбәт булған. Эш хаҡы ла түләйҙәрме әллә?

- Эйе.

- Кит әле! 

Икеһе лә дәртле, улар күтәрә алмаҫ ауырлыҡ, үрләй алмаҫ тау юҡ.  

- Ҡалала, әгәр мөмкинлегегеҙ булһа, ниндәй проблеманы хәл итер инегеҙ? 

- Юлдарҙы рәтләр инем. Күмертау юлдары ҡот осҡос. Шунан стадионды төҙөтөп бөтөр инем, Совет майҙанын, - Ксения тиҙҙән ҡала башлығы менән осрашырға тейеш, һорауҙарын әҙерләп тә ҡуйған, улары бер ҡосаҡ. 

- Ә районда ниндәй бәлә иң ауыры?

Дмитрий байтаҡ ваҡыт Райпола эшләп киткән, шуғалыр, тәүҙә ошоно әйтте:

- Райпоны тергеҙер инем. Башҡа райондарҙы ул арыу ғына эшләй, беҙҙә, ниңәлер, илке-һалҡы. Спиртзаводты киренән асыр инем. Был завод үҙ тарихында бер тапҡыр ғына ябылған булған, Граждандар һуғышы ваҡытында, ә башҡа мәлдәрҙә, хатта Бөйөк Ватан һуғышы ваҡытында ла, эшләгән, ә беҙҙең быуын уны шатырлатып япты ла ҡуйҙы...

Әңгәмә киләһе һанда гәзиттә баҫыла.