Ауыл хакимиәте тиҙҙән иҫке тәҙрәләр урынына кире ҡайта тип яуап биргәйне, һүҙендә торған. Дөрөҫ, тәҙрә тигәне тәҙрә түгел, шулай ҙа ябыҡ. Һыуыҡ инмәҫ, яҡтылыҡ төшмәҫ. Рәхәт. Барлыҡ тишек-тошоҡтарҙы, ыжғыр ел керерҙәй ярыҡ-йороҡтарҙы, ошолай рәхәт кенә, фанера менән, ябып ҡуйып булһа ине. Улай тиһәң, үтә ныҡ ҡапланып, ҡараңғыла ҡалыуың ихтимал. Ҡыҙыҡ был донъя: ябылһаң да ярамай, ныҡ асыҡ булһаң да ҡыйын.