Өмә дауам итә

Беҙ барғанда паркта тынлыҡ ине, сәғәт ике тулған, ә һаман береһе лә юҡ. Ҡапыл ҡуҙғалып сығып китеүе кешегә ауырҙыр тип, көтөргә булдыҡ. Төҙөлөш бүлегенән Руслан Вәлитов бер үҙе генә сыбыҡ тотоп йөрөп ята. Бер аҙҙан парк тулды - быныһы мәҙәниәт, быныһы иҡтисад, быныһы финуправление, мәғариф, тегеһе -ауыл хужалығы... Һанап та бөтөрлөк түгел. Эш китте ҡыҙып. Уңарсы, Ермолаево урамдары буйлап, кеше ташлаған сүпте машиналарға тейәп ебәргәндәр икән - Эко-Ситиға кәрәкмәгән сүпте тейәгәндәр.

- Уларҙы ташлаған хужалары сығып эшләштеме?

- Эшләте һиңә, тәҙрәнән ҡарап ултырһа ултырғандыр, береһе лә күренмәне.

Серәкәй... Тәндәге бөтөн ҡанды эсеп бөтөрҙәр кеүек тойолдо. Тик барыһы ла ауыл кешеләре, ундайҙы бәләкәйҙән күреп үҫкән әҙәмдәр, береһе лә мыжыманы. Бер ир (водитель тинеләр), ныҡ булдыҡлы ирҙер, машинаһына арба тағып килгән - утын тейәргә. Өмәнең файҙаһы үҙенә лә тейһен әле.

Өс ҡатлы йорттан сыҡҡан халыҡ шулай өмә менән мәж килде. Бер ҡараһаҡ, ҡапҡанан йәнә бер көтөү кеше инеп килә, былар бөтмәне икән һаман тиһәк, быныһы туй икән. Фотосессияға килгәндәр. Өмә бөткәс, унан да яҡшырағы, ремонт бөткәс (бында елле ремонт бара) килһәләр, яҡшыраҡ булыр ине. Тик йәшлек көтөп тора буламы? Күңелдәре булғансы фотоға төштөләр, лауылдаштылар ҙа, пипелдеген сығарып, ресторанға киттеләр. Ә өмә дауам итте, серәкәйҙәр һәм ремонт бөткәнен ул да көтөп тора алмай ине.