Биш битлек теләк

Барыһы менән бергә әле барған Йәштәр форумы тураһында ла әйтергә кәрәк.

Элек тә булды был форумдар, мәҙәниәт һарайында ла, асыҡ һауала ла. Форумды үткәреүҙең маҡсаты бер: йәштәр, ҡайтығыҙ районға!

Быныһының да шиғары ошолай уҡ. Район башлығы Лира Тереғолова бөгөн үтә ныҡ хисле:

- Һеҙ миңә форум алдынан биш битлек теләктәр яҙған инегеҙ. Элек тә әйтә килдегеҙ, теләктәрҙең береһе -бассейнды асығыҙ, төҙөп бөтөгөҙ ине, бына, ул бөгөн эшләнде, бассейн асылды, - тине йөрәкһегән башлыҡ, - һеҙҙән артабан да теләктәр генә түгел, төрлө идеялар хаҡында ишетке килә, аңлағыҙ: мин бер үҙем бер нимә лә эшләй алмайым. Ярҙамға һеҙ – йәштәр – кәрәк.

Йәш-елкенсәк үҙҙәренең проектары менән сығыш яһаны, районды нисек, ҡайһы тармаҡта үҫтерергә була. Шуныһы ғына: бындай ялҡынлы телмәрҙәрҙе, һүрәттәр, схемалар төшөрөлгән проекттарҙы күп күрҙек, бынан ары улар ҡағыҙҙа ғына ҡалмаһын ине. Биш бит түгел, йөҙ бит яҙ – һеҙ булмаһағыҙ,  егеттәр-ҡыҙҙар, беҙҙең киләсәк юҡ.