Свет, камера, мотор!

Хәтерегеҙҙә булһа, район Пионерҙар йортоноң Ресурс үҙәге етәксеһе Регина Акилова грант отҡан тип бар донъяға шапырынғайныҡ.

Аҡсаны уңлы-һуллы әрәм-шәрәм итеүгә бирмәнеләр, кино төшөрөргә тип тотторҙолар. Һәм бына, күптән көтөлгән һүҙҙәр яңғыраны: Свет, камера, мотор!

Кемдәр актер? Төп ролдәргә кастинг-ғәләмәт үткәреп тороу, унан да бигерәк, ниндәйҙер билдәле артистарҙы саҡырыу кәрәкмәй ине, барыһы ла үҙебеҙҙә - Ермолаево силсәүитендә йәшәй, 300 улар. Һуғыш балалары. Фильм улар хаҡында. Фильмдың тәүге геройы - Просвиркина Ангелина Карловна, һуғыш башланған йылда тыуған инәй. Нимә күргән, нимә кисергән, ғөмүмән, нисек йәшәй, йәштәргә әйтер нимәһе бар - фильмда барыһы ла буласаҡ. 

Әйткәндәй, оператор, ут тоҡандырыусы, тауыш өсөн яуаплы кешеләр ҙә барыһы ла үҙебеҙҙекеләр. Ермолаево коррекцион мәктәп-интернаты балалары. Режиссер? Регина Акилова үҙе, ВГИК-фәлән һымаҡ уҡыу йорттары бөтмәһә лә, бик таланты ҡыҙ, Тарантино йәки Скорсезелар ары торһон.

Премьера мәлен түҙемһеҙлек менән көтәбеҙ. Уңыштар!